لقيت لي ذود ٍ تجي حول ميتين - محمد السمي

لقيت لي ذود ٍ تجي حول ميتين
سود ٍ سواة الليل حول الصداوي

ماني بمسرع سرعتي حول تسعين
فرقت يوم انا الطريق امتساوي

لقيتها عقب العصر يوم الاثنين
في فيضة ٍٍ خضراء بجو ٍ خلاوي

الوسم وسم شيوخ نجد السلاطين
ان كان قلبي ما يخون الهقاوي

مشرهفات ٍ يسبقن المحيلين
هن الهوى وانا عليهن هواوي

سبحان خالقها ومخس الشياطين
المجهم اللي عن ثمانين شاوي

من ذود متعب حي ذيك الحجاجين
يا حي ذيك العين عين النداوي

متعب ولد عبد العزيز احمر العين
اللي على كسب المراجل نحاوي

وشلون اوصف ذود الامير بالزين
شوف ٍ يهول العين وامر ٍ سماوي

وحملي غدا من جور الايام حملين
بين الرجا والياس وبين المناوي

مدري وش اللي حطني بين خطين
مشواري اللي فوق وارد عراوي

والمشكله ذود ٍ يجي حوا ميتين
لقيتها عقب العصر فالصداوي

ياليت عندي مثلها لو ثنتين
امسي فقر واصبح عليها غناوي

وانا بعود مير ما هوب الاثنين
يوم الربوع اللي يجي للصداوي

© 2024 - موقع الشعر