انا ليا مني تذكرت عديت - محمد السمي

انا ليا مني تذكرت عديت
في راس رجم ٍما يويقه بدالي

اليا تذكرت المداهيل ونيت
الله واكبر فرقتنا الليالي

يوم اتذكر جيرة البيت للبيت
تهشم ضلوعي مما طرالي

لا اخذت لي مده وسافرت مريت
امر مدهاله وانا الحال حالي

امر مرحانه وازيد التناهيت
يوحش خلا المرحان والدار خالي

ضلينا بدو ٍ ننتزع للمنابيت
نمشي على برق الحيا فالخيالي

واليوم يا خلي كبرت وتناسيت
ما تنشد وتدري وش اللي جرالي

ليتك تصور موقفي عقب مابطيت
وتشوف حالي عقب سود الليال

كم بيت غال ٍ دون بابه تحاديت
الا انت جرفي يم بيتك هيالي

لا شفت مفرق بيتكم ما تعديت
الف لا من الطريق استوالي

ان رحت والا جيت والا تمشيت
الله واكبر يا زمان ٍ مضالي

عز الله اني عنك ما قط سجيت
تطري عليه ما تفارق خيالي

وعز الله اني ما خبر اني تخليت
لكن وقتي يالغضي ما صفالي

والظاهر انك في غيابك تماديت
لله درك يا حسيين الدلالي

بس المهم اني على الرجم عديت
يوم ان زولك في غيابك طرالي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر