ياموتري لا نخيتك لا تخليني - محمد السمي

ياموتري لا نخيتك لا تخليني
ابي ديار ٍ عليها القلب ملتاعي

عامين يا موتري والبعد حاديني
وانا تولعبها قلبي تولاعي

صبرت عنها مع العامين عاميني
لين ان قلبي عليها قام ينزاعي

واليا تذكرتها والليل ممسيني
افز كني غرير ٍ قام مرتاعي

دار الغلا والدلع والدل والزيني
اللي هواها يهب ويرفع اشراعي

كله غلا مهرة ٍ تكتب عناويني
عذلت قلبي يوادعها ولا طاعي

وشلون مغلي وطن مدعوجة العيني
مدري متى نلتقي وتزين الاوضاعي

عز الله ان المواجه بس يكفيني
شوف ٍ يداوي دموع العين واوجاعي

يا حسين مابي وصاه ولا توصيني
اللي سواتك معي يصير فزاعي

انا المسافات حالت بينه وبيني
ليت الغرابيل فالاسواق تنباعي

وان عاش راسي لارد الصاع صاعيني
مدام قلبي قام عليها ينزاعي

وان كان يا موتري فالوقت مصخيني
دورت غيرك يذب فجوج ٍ وساعي

© 2022 - موقع الشعر