انا ليا مني تذكرت عديت
في راس رجم ٍما يويقه بدالي
اليا تذكرت المداهيل ونيت
الله واكبر فرقتنا الليالي
يوم اتذكر جيرة البيت للبيت
تهشم ضلوعي مما طرالي
لا اخذت لي رخصه وسافرت مريت
امر مدهاله وانا الحال حالي
امر مرحانه وازيد التناهيت
يوحش خلا المرحان والدار خالي
يوم انا بدو ٍ ننتزع للمنابيت
نمشي على برق الحيا فالخيالي
واليوم يا خلي كبرت وتناسيت
ما تنشد وتدري وش اللي جرالي
ليتك تصور موقفي عقب مابطيت
وتشوف حالي عقب سود الليال
كم بيت غال ٍ دون بابه تحاديت
الا انت جرفي يم بيتك هيالي
لا شفت مفرق بيتكم ما تعديت
الف واذكر حل وقت ٍ مضالي
ما تدري اني عنك ما قط سجيت
تطري عليه ما تفارق خيالي
عز الله اني ما خبر اني تخليت
لكن وقتي يالغضي ما صفالي
والظاهر انك في غيابك تماديت
لله درك يا حسيين الدلالي
وتدري ليا مني تذكرت عديت
في راس مذروب ٍ حصاه استوالي
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.