أبي سياقي ذود شعل ومغاتير

أكيد غير وكل ما قلت لك غير
ميزني ربي بالترف واللباقه

حتى صباح الكون في طلّتي خير
بيني وبين النور جوّ وعلاقه

أفرح بشوف الديم والعشب والطير
وأفرح بشب الضوّ قبل الشراقه

وأحب شرب الكيف في حزة عصير
ما حاسه الهندي وزود حراقه

وافز لا قالوا لفانا مسايير
رباني عودي يعتزي بالرفاقه

واحب قرمي يجمع الطيب والخير
يتعب على المعروف والصيت شاقه

أبيه مطنوخي ولد عز وأمير
ابيه عشق جنون ما هي صداقه

عقيد قومي مورثينه مناعير
أشوف فيه البدو أصل وعراقه

واذا يبيني مهرته جد لا صير
اشوم عن غيره وأجيله عشاقه

وأبي سياقي ذود شعل ومغاتير
هذا مهر عشقي وهذا صداقه

ما بي هوى لندن وحلم المشاهير
ناسي ورا الموضه تدور رشاقه