غدر الصديق

الله من هماً يحوس الصدر حوس.
والله من فكراً على طول منحاس.

كني سجين(ن) بين جدران محبوس.
والباب واحد مير مليان حراس.

احدن معاه الرمح واحدن معه قوس.
واحدن فطين ودايم يراقب الناس.

ماهمهم قلباً من الضيق متروس.
يالعنبوهم بالقفى مثل جساس.

سبة صديقاً يحسب الغدر ناموس.
بعد المعزه طاح واعلن للإفلاس.

هان الصداقه واصبح اليوم جاسوس.
ينقل علوماً مالها قيمه وساس.

راع النميمه بان لوكان مدسوس.
شفنا علومه واتضح طير قرناس.

وانا كشفته والزمن كله ادروس.
واكثر دروس الوقت من دون كراس.

بعض الصداقه حبلها يقطعه موس.
لاصار مابه صاحباً يرفع الراس.

وبعض الصداقه حبلها حيل ممسوس.
ماينقطع من ضربة السيف والفاس.

عليك باللي دايماً يرفع الرؤس.
رجل(ن) ليامنه حضر ياخذ الكاس.

وجنب ردي(ن) ناخر عظامه السوس.
مافيه عزم ورفقته كلها يأس.

ابعد عنه وادفع على فراقه فلوس.
بُعده غنيمه كنها اللؤل والمأس.

واحذر من الي ف القفى دايسك دوس.
واليا حضرته يمدحك بين الاجناس.

الشاعرنايف الرشيدي