غدر الصديق

البارحة من ضيقة الصدر سهران
من سبت الهوجاس فالصدر ضيقه

فتحت لي بيبان واغفلت بيبان
بين أغراب البين وسمع نعيقه

المشكلة ماهيب صدن وهجران
المشكلة يومي عرفت الحقيقه

حقيقة اللي كان له قدرن وشان
اللي مواثيقه بصدري عميقه

ما كنت اصدق فيه من كاينن كان
شخصن اعزه دون كل الخليقه

ما قيل فيه اقول زورن وبهتان
كلفت نفسي فوق مالا تطيقه

لكن بعد ما شفت انا شوف الاعيان
هانت علي ذيك العهود الوثيقه

خلاص بعد اليوم في ناظري هان
لاصار ما يحفظ عهودي طريقه

يا شينها لا طاح من عينك إنسان
ياشين نكران الصديق لصديقه

ياشين لامن صرت واثق وغلطان
ياشين طعنات القلوب الرقيقه

من يامن الدنيا على طول الازمان
لا بد عسرات الليالي تعيقه

رحلتك في الدنيا مدينن وديان
لا حان دينك ممهلك لو دقيقه

هذا كلام التجربه خير برهان
من وافين ذاق الغدر من رفيقه

ماهو صحيح ان قال ماهوب ندمان
الا الندم ولع بقلبه حريقه

عن واقعن عاشه وعن خافين بان
أصبح سرابن منه مابل ريقه

حتى لو انه جامل الناس بلسان
اصبح مع الهوجاس كنه شقيقه

يمكن مع الايام يسلى بنسيان
مير البلاء نقض الجروح العتيقه