منقية مسلم ال زرفل اداء سعد اليامي

لـ ، ، في المنقيات و الهجن، آخر تحديث :

العزاوي تفتخر والفخر هاض القصيد
والقصيده باشة الشعر يا شيالها
ان نضمنا الشعر ماننضم الا للجديد
ماكتبنا في القصايد ياكود جزالها
وان مدحنا نمدح الكفو ما عنه نحيد
الرجال بطيبها تنذكر بافعالها
يا سعد طلوح بصوتك على اللحن الفريد
نومس اللي في مطانيخ ربعه قالها
اقدم اقدم يابن زرفل ولك باسٍ شديد
المراجل والنواميس لك فنجالها
هات وضح سبيع وسبيع لك عضد وعضيد
لابةٍ ما ينعثر في الوغى خيالها
لابة الغلباء هل الصيت والمجد التليد
الاوايل قسمها ما تليق الا لها
قالوا انه ما يفك الحديد الا الحديد
والحمول الكايده مالها الا جمالها
وعزوتك الاد عامر هل الصيت المجيد
يوم ساحات المعارك تعد ابطالها
صلب جدك راس مالك حزامك والرصيد
جمعهم يسوا بنوك الذهب واموالها
ادحم اهل البوش واثق ولك زندٍ جويد
خل ذيدان المنافس يزيد جفالها
عادهٍ لك يا مسلم على الكايد عنيد
لين بيبان الزعامه تفك اقفالها
لك على الفردي رياده وتطمح للمزيد
وانت كفو للمهمات يا رجالها
فوز شواشه على الوضح فالاول شهيد
بالتحدي جابت الفوز محدن طالها
وهالسنه يم الثلاثين صامل بالوعيد
مزرفلات مشوشه والسعد بقبالها
نخبةٍ في وصوفها راعي النظره يشيد
مع هل الذيدان يصعب تشوف امثالها
هزعة العرقوب وارقابها مثل الجريد
كنها ترقب مزونن يلوح خيالها
الولع والولف فيها ليا طق اللبيد
من سطرها للموده تخل عيالها
لآ حزم مقهورها خلف والشده بعيد
ما دحمها بالمناكب يكود ظلالها
مرهيه بالفوز والله يفعل ما يريد
والهقاوي والعزاوي يسرك حالها
مير ياهل الوضح صرح مسلم بالوكيد
هالسنه هل الثلاثين نشغل بالها
تم قولي يابن عمي على النهج المفيد
وانت فايز والنواميس لك فنجالها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر