ترانيم الزعل

وش لي على طول العنا والاّ الزعل وشهوله
مادام جفني من طويل الطايله يرثاله

يكذب لساني لو يقول اني بشيل احموله
هذا الهوى مثل البحر مالي ومال اهواله

غيص البحر مفلس مْن المرجان ويّا لوله
في رحلته يرثي له النهّام ما غناله

غنوا له (اليامال)و(الهولو)بعد غنّوا له
لكن ترانيم الزعل تطغى على مواله

يا زايد الحرقه على الحرقه كذا . منهوله؟
اصرارك الزايد على قطع الوصل وحباله

غرّك جمالك وامتهنت الدلعنه والطّوله
يا شبه ريمٍ جفله ظول الشمع وظلاله

لا اقبلت شديت الرحال وغلطتك مقبوله
عندك . ولاقفّيت ذليت ازرقك بسباله

يا سيدي دعني وانا في حل من محلوله
دامي معك للآن عقلي قاضبٍ طرباله

وانا كفيل اللي سأل عنك وانا مسؤوله
بقول ما قصر حبيبي جمّل الله حاله

ماني على ما قيل لا غرّب يخرب حوله
انا الذي من هو تعلم من ابوه وخاله

لا من خصمنا ما فجرنا واكتسبنا الجوله
لربما خصمك بعد مده يعيد احواله