صيحة خلا

ياهاجسي ما شفت منك البارحة غير الهموم
اللي على قلب الشقا من كل صوب تلمها

وش عاد لو بشرتني بالنصر والقلب مهزوم
من صد عذرا طيفها عندي وهي عند امها

والرايح اللي ما يجي والطايح اللي ما يقوم
في حبها حظ معثور فرحته ما تمها

مثل العمى ما يبصر الا في منامه بالحلوم
والى صحى يخطي عصاه امرار قبل يخمها

كنت احسب ان الشوق لا دام التجافي ما يدوم
لين انتهى دمع العيون وسال عقبه دمها

وبعض الرجا مهما يطول الصبر ما يقضي لزوم
صيحة خلا مهما يطول الصوت محد يمها

ياقلب انا ما اقول ذم اللي مقدر و محشوم
ليلى على جور الهوى مجنونها ما ذمها

لكن لو انك تحتكم للعقل في بعض العلوم
ما صارت اكبر همك اللي ماانت باكبر همها

خليتني في غم نفسي مندفع باقوى عزوم
والوم خلق الله وانا والله سبايب غمها