صيحة الحب

لـ محمد المفضلي، ، في غير مُحدد، آخر تحديث

صيحة الحب - محمد المفضلي

وش حل بدروب المحبين يا ناس
يوم أكثر العشّاق راحوا ضحايا

عقب الوصل وعيشه هنيه ونوماس
شنّو حروب البين وراحت سرايا

هذا عديم أحساس وهذا بهوجاس
بقلوبهم في البعد ماتت خلايا

وهذاك لا منه طرت له إيناس
تلاقاه مشرف فوق راس المنايا

واللي معاناته كتبها بقرطاس
في محكمة حبه مسوي قضايا

وأخر حديث أثنين حبوا بإحساس
تفارقوا وصاروا قصه وروايا

ما بينهم سيفً وبابً وحراس
حيث أنهم صاروا حديث القرايا

طاحت نواقيس التّوله والأجراس
وما عاد باقي لصيحة الحب بقايا

العام منّي خالي الهم والبأس
والشكر والحمد لرب البرايا

سليم من ساسي إلى عالي الراس
وموقّعه الصحة خالي البلايا

وبالكون ما به لفرحة القلب مقياس
يبي يطير وماسكته الحنايا

واليوم فكري من جفا زوين محتاس
ميت ومعلن للخلايق عزايا

وحدي وفي عزله عن عالم الناس
ما ألومهم والله هذا خطايا

جنيت زرعاً كنت ساقيه وغرّاس
وهذا حصادي بعد طول الرجايا

القلب صابه بوصل الاحباب ليأس
رضيت بالمكتوب كل الرضايا

ما عاد باقي بدنية الحب نسناس
ولا عاد ينفع البكا والنعايا

ودرب المحبه صار ما عاد ينداس
لا صرت والعشّاق دايم ضحايا

© 2024 - موقع الشعر