لا كثر الله خيركم يا هوامير

لا كثر الله خيركم .. يا هوامير
ياعلكم للفقر هامور .. هامور

صرتوا كبار القوم وانتم طراطير
من كد ناسٍ حالهم كان مستور

في سوقكم ياما كلوها خوابير
لين اصبح الميسور ماهوب ميسور

انكبوا العالم عليكم طوابير
كلٍ يجي من صوبه مْطفي النور

دينٍ وتقسيطٍ وبيعٍ وتأجير
وبالحلم يبنون استراحات وقصور

والكل منهم عنده اربع غنادير
يْعيش معهن طيلة العمر مسرور

والموتر اللكزس رفيق المشاوير
والا بنوراما .. وتاجر ومشهور

واللي من اول صعب جاء وقته يْصير
مادام به ثروه على الصعب مقدور

احلام ربح وعودت بالمخاسير
لين انصدم في واقعه كل مغرور

اتضحت الصوره بعد طول تخدير
لاهل العيون العمْي والحول والعور

وانهارت الاسهم بدون اي تحذير
الا خبر عاجل وبالصحف منشور

زِف الخبر حول اختلاس الدنانير
ياعنك ماهي زفة مْهند ونور

ضربة حجر صادت جميع العصافير
في ساعةٍ فيها الصقر صار عصفور

كم واحدٍ منهم عليه الفواتير
يبقى يسددها إلى نفخة الصور

وامراض نفسيه وهم وتفاكير
والضغط بس يفور ويفور ويفور

وازمات قلبيه ورزمة عقاقير
وفي كل يومٍ موعدٍ عند دكتور

ما تصلح احواله طوال المعاذير
من كل مزمارٍ من الخلق مأجور

في كل تحليل اقتصادي وتبرير
وقف بصف المتهم شاهد الزور

مابه سوى تفسير يحتاج تفسير
اللي فتِح له باب ما يطمر السور

دمركم الله يا سبب كل تدمير
سعيٍ سعيتوا فيه ماهوب مشكور