لاباس ياروح ٍ بها الهم لاباس - عبدالمعين بن عقل الثعلي

لاباس ياروح ٍ بها الهم لاباس
روح ٍ يشاعفها هجوس وغرابيل

روح ٍ بها من كل هم ٍ وهوجاس
للهم والهوجاس فيها مداهيل

هم وغرابيل وهواجيس وعماس
دايم على روحي مقافي مقابيل

والعين كن ّ الها عن النوم حر ّاس
تقول هاو ٍ في بردها سماليل

واليا امتلت عين الخناعيس بنعاس
نومي على كوعي سهاج وتعاليل

اللي سوالفهم سواليف الا تعاس
هر ّامة المجلس هل القال والقيل

الله على ماخذ ليا الفجر مجلاس
مع شولقي ّ ٍ في هروجه تعاليل

سوالف ٍ فيها عجايب ونوماس
طبعا ً لفتخان اليدين البهاليل

قالوا ونس قلت الله اعلم بالاوناس
قولو ولو قلتوا بعقله دهاويل

ياناس خلّوني ولو حسّني حاس
غيري فلا لاحد ٍ بهمّي مداخيل

همّي بقفل ٍ مال مفتاحه اجناس
ولاكل مفتاح ٍ يحل الصواميل

قم صب لي يابدير مايقعد الراس
من ذلقة الدلّه ثلاثة فناجيل

قد قالها من كل قوله على ساس
قدمي وفازبها شجاع الرياجيل

انا اشهد ان الحي في طبعه اجناس
من كل شي تراث جيل ٍ بعد جيل

معنا سوالفهم جديده ودر ّاس
وهذا على مايذكرون الدواليل

الجود ورث جدود ناس ٍ بعد ناس
وهايب ٍ تعطى بحظ وتنافيل

ولاطار من عش ابرق الريش قرناس
ولايثمر الحنظل بعنبر ولاهيل

© 2022 - موقع الشعر