عنّ ..فكري للقصايد وسبقتني له يدي=ترسم دموع القوافي عمرٍ أقفى مركبه - عبدالرحمن بن عبدالله المجلي

عنّ ..فكري للقصايد وسبقتني له يدي
ترسم دموع القوافي عمرٍ أقفى مركبه

لاهبٍ بأقصى ضميري حاديٍ قلبي حدي
عاديات الوقت الأقشر قصصت طول شنبه

شاردٍ من جور بقعى.. مبعدٍ عنها يعدي
لين عجز.. وطاح يزحف وانثنى فوق ركبه

أحمد الله في المراجل .. باذلٍ كل جهدي
أتبع اللي فيه عزي.. منكبي في منكبه

ماتعلمت الدناوة..ولّ ياولد الردي
ياعسى الله يحرم اللي ما يقدم مزهبه

المعالي في حياتي دوم فرحي وسعدي
تاركٍ درب السماجه للحصيني وعنبه

لو ملكت الكون كله.. والكواكب.. والجدي
ماتساوي دون وجهي وجبةٍ في مسغبه

ومن دعاني للخيَابة .. قلت ما أسمع مهتدي
تابعٍ سنة ( محمد ) مذهبي من مذهبه

عبدالرحمن بن عبدالله المجلي
راعي مرات

وقد جاراها المبدع
عبدالعزيز الضويحي

عاش من صاغ المعاني بالمكارم مقتدي
اشهد إن فعل النشاما والكرم ما يتعبه

كاسبٍ قولة :(نعم .. ياراعي الكف الندي)
والعرب وان جاء مجاله كل شيخٍ وجبه

حصل النوماس مبطي ..يوم توه مبتدي
اسأل الله إن يزيده ويتحقق مطلبه

فيك يا(راعي مرات) ..القرم ياولد بلدي
صغت لي بيتين ردٍ للبيوت المطربة

عبدالله عبدالعزيز الضويحي
© 2024 - موقع الشعر