من( شعيب الشمس) لك باقة ورود =و(النخّيل ) وكـل وديـانٍ جـرت ( قصيدة المطر) - عبدالرحمن بن عبدالله المجلي

أبيات بعثها الشاعر عبدالرحمن المجلي لمجموعة من الشعراء فتوالت ردودهم عليها
....

(1) من( شعيب الشمس) لك باقة ورود
و(النخّيل ) وكل وديانٍ جرت

ومن علاوي (كميت) هبت ريح عود
ساقها الغربي وهلت وأمطرت

وامتلت كل الخباري والسدود
والجروح الخافية غصبنٍ برت

راعي مرات /عبدالرحمن المجلي
.....

(2) المطر والبرق وزمجرة الرعود
من فضل ربي على الديرة عطت

نحمدك يارب بليت الكبود
والأراضي المحل باالماطر روت

يالحكيم الخير حدر في السدود
والشعاب إللي على خبرك جرت

( نوماس) محمد إبرهيم الهويمل
.....

(3)السيول أشوفها بحد النفود
والمطامن كلها قد غدرت

زين هاك البرق قافيه الرعود
لا لمع برق السحايب أمطرت

( النخيل ) إللي تعدى للحدود
حادرٍ وأيضا الكباري عبرت

نديم كميت /حمد الدعيج
.....

(4)ولك مثل ما أرسلت يالغالي وزود
وزودها ماكتب للعين وقرت

والسحاب إللي نهض عقب الركود
إستغاثة طالب الغيث أثمرت

تشرح الخاطر بروقه والرعود
وعقب ماهلت غزير الماء سرت

وحدرت وديانها سيل معدود
والنفوس لمنزِل الغيث شكرت

أبو هاني /حلوان الحلوان
.....

(5)مرحبا باللي علومه دوم زود
مرحبابه كل ما الشمس أشرقت

وصلني حرفك وأنا فوق النفود
والسحابة ياحلاها لاأبرقت

أرسلت ماهاعلى هاك السنود
والغراميل رقصت واستبشرت

والزهور إستيقضت عقب الرقود
وفاح ريح النبت والطير صدحت

والله إن ماكني إلا إبن سعود
فوق هاك الطعس والأرض ارتوت

(أبومحمد) فهد محمد الفهيد
.....

(6)مرحبا ترحيبة دايم تزود
عد ماحجت جموع وكبرت

ونشكر إللي نزل السجدة وهود
غاثنا يوم العباد إستبشرت

ماحلى البراق مع صوت الرعود
فوق مانح هو وكافت لامطرت

وهل ودانه على كميت بركود
وقيل قصر الشمس وديانه جرت

وامتلت بالمملكة كل العدود
والخزامى في فيافيها أزهرت

قلتها ياصاحبي ضمن الردود
والبيوت إللي لقافك سايرت

أبو سامي /عبدالله بن محمد الضويحي
.....

(7)مرحبا إعداد رملٍ بالنفود
وعد مازرعت زروعٍ وأثمرت

باللي سطر حرفه الغالي بركود
و المعاني فيه أوفت مقصرت

خير ربي عم ونطلب منه زود
والناس تبشربه إذا هي شكرت

وأبشرو بالخير ياراعي القعود
والديار إللي تبيها ربعت

ياعزيزي عقب بيحت السدود
إسفهلت في خفوقي وأنورت

شاقني معناك وأرغمت الجهود
المثايل يارفيقي إحضرت

يوم جاني بند من ضمن البنود
من جهتكم والمشاعر عبرت

كل لفحة من جهتك أبرت كبود
لو تثير الناس عنها مادرت

وأنت راعي الأوله عندي شهود
والحضيضة ناس بالطيب ظفرت

المغفور له /محمد عبدالعزيز المسلم
.....

(8)لا بالأنواء ولا بنو سعد السعود
بفضل ورحمة الله أمطرت

هلت الأمطار واستر الوجود
وكل نبتٍ له نواوير أزهرت

حي ذكر الشمس مدهال الجدود
في مرات إللي بهواها أسكرت

سحرها في رياضها ورمل النفود
والجبال السمر وهضاب أمغرت

لونت بترابها ذيك الحيود
ومن علاوي كميت للعين أبهرت

راعي مرات أهلين أوفيت الوعود
أنورت بك ديرتك ثم أسفرت

محرين بالطيب جاوزت الحدود
ذاتك إللي عن سجاياك أخبرت

لك تحاياً ناج به عطر الورد
وصنع ربي يفوح ريحه لاثمرت

محمد الشبيكي / أبو ناصر ( شفاه الله)
.....

(9)ياحكيم الوقت عيا لايجود
نعنبو هالحظ علومه دحدرت

كل ماقلت الزمن دايم جحود
لامني ناسً باعت ماشرت

إن زرعنا الورد فيا شهب الورود
والشجر خبرك طلوعه ما أثمرت

العوض في الرأس والمال معدود
وكل مازانت تهاوت واقفرت

وش بقا ياحظ غير إنك تعود
وتنقض جروحي عقب ماهي برت

ياسنيدي في زمن مابه سنود
أمسح دموعٍ على خدي جرت

هذي أبياتي تجي ضمن الردود
ياحسايف زاد حزني من أمطرت

علي محمد الدعيج / ابو محمد
.....

(10)المطر رحمة من ربٍ ودود
والدعاء مشروع إذاهي أمطرت

ندعي المولى إذا أوحينا الرعود
وما نصفق إذا هي زمجرت

عارض الوادي تحسبه قوم هود
عارضٍ ممطر وهي به مادرت

كم قرية دمرت عن الوجود
يوم بالنعمة طغت واتكبرت

إسم مستعار / شاهر العبد الله
.....

(11)مرحبا باللي يحيي بالورود
والفعل مشهود مزنٍ أمطرت

المزون إللي تقافت بالرعود
إنتثر ماها شعابٍ حدرت

الوسم قبله نبت من كل عود
والرجع جانا بنوه بشرت

زالت الكدره عساها ماتعود
جونا صافي وهمومه سرت

إبراهيم محمد العمر / أبو نواف
.....

(12)الجميع أخوان جادو بالردود
والقوافي من شعرهم قصرت

وكل شاعر في مرات بلا حدود
له مشاعر والمعاني عبرت

ذا نديم كميت وذا فهد الفهود
والضويحي والهويمل سايرت

شاهر وابن العم والخل الودود
والنسيب إللي تعابيره سرت

وناس تنسى الشعر وفي لحظة تعود
وناس لو تسمع قصيد كشرت

الحكيم اللي يحرك هالجمود
فرج العالم ولوهي ماشرت

بس شاعر يختلف عنهم بزود
غصب عيني خيلت له وأمطرت

أبو ناصر محمد الشهم الصمود
سيرته تملك شعوري لاطرت

قلتها ماني على القول محدود
الشهامة في محياه إنبرت

كم مرة أنوي أزوره واعود
لاوصلت الباب رجلي سمرت

ويختلط في خافقي خوف وشرود
ضايعن ودموع عيني حدرت

إدمح الزلات تكفى والصدود
يعلم الله مانسيتك أو طرت

أبو فارس / إبراهيم عبدالله المجلي
.....

(13)وقد رد أبو ناصر
على قصيدة أبو فارس بالقصيدة التالية

تسلم عيونك يابعد من في الوجود
ياربيع الكون دنياك أسفرت

طيبٍ بالطيب جاوزت الحدود
ماوطيت بخد إلا واخضرت

جعل من أرثك بجنان الخلود
عند من عنه الرسالة خبرت

منزلك قلبي وأغيض به الحسود
معك نفسي مابه أحدٍ أخشرت

ماذي بزله .. ذي دواءٍ للكبود
عبرت عنها المشاعر واعذرت

مايصل هذا إلى وضع البرود
لاحشا لله نفسك ما احضرت

دايمٍ تسمو وتسعى للسنود
ماتهوجس بالمطامن أو ضرت

حسنة أخلاقك ولا تبغي شهود
صامت الطيبه عليها وافطرت

جمل الله حالك أوفت العهود
لحسن ذاتك نفس أخيك أكبرت

محمد عبدالحكيم الشبيكي /أبو ناصر
.....

(14)المطر نعمه من الوالي الودود
والفيافي بعد ماطرها ازهرت

والحلال استانس بعشب وورود
مع غدير صافي ما كدرت

وبعد هذا نطلبه يملا السدود
يوم كل شعاب ديرتنا جرت

أسم مستعار/سواح
.....

(15)مرحبا يامهدي الباقة و زود
ريح طيب فاح منها وابخرت

جاك قاف يسبق الريم الشرود
يوم ذيرها المبندق ونفرت

يم ضلع كميت ساقتها الرعود
وزبنت دارٍ الى باعوا شرت

ديرة ٍ فالوشم بالغالي تجود
كم حمولٍ يم طالبها سرت

في مرات الخير دايم و امعقود
وان طرا جودٍ على بالي طرت

عبدالعزيز بن عبدالله الضويحي / ابوعبدالله
.....

(16)ماهقيت القاف يحمل شي زود
عن شعوري قاف ربعي عبرت

والثناء للي على عباده يجود
هللت كل النفوس وكبرت

كتاب الأمس / عبدالرحمن بن فهد الدايل
.....

(17)أحسب إنك يا سعد ترقى سنود
وش بلا قيفان شعرك دحدرت

كان ماتقوى تجاري هالردود
فالقصايد عنك ما والله درت

أبوفهد عبدالعزيز
( أبيات عتب لأحد الشعراء الذين لم يجاري)

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.

مناسبة القصيدة

رسالة جوال أرسلت للعديد من المبدعين من الشعراء مع بشائر الخير التي هطلت مساء يوم الجمعة أمس الموافق 7/ ربيع الثاني / 1430هـ و هطلت مشاعرهم بكل ود بهذه الأبيات

© 2021 - موقع الشعر