راعي مرات وسيد القاف حييت** ياللي القصايد سلمت لك رسنها - عبدالرحمن بن عبدالله المجلي

إخوانية بين الشاعر/ فهد محمد الفهيد وأ. عبدالرحمن المجلي
...

....
....

راعي مرات وسيد القاف حييت
ياللي القصايد سلمت لك رسنها

بين الفحول وقادة الشعر لك صيت
ياشوق من عجز المحبين عنها

لك نقضت شقر القرون وتقول: ايت
والعود الأزرق لأجلكم فاح منها

قالوا لها تخيري في العناتيت
اللي على الشدات تامر وتنهى

قالت لهم شفي ترى راعي ( كميت)
والله فرق بين الفروض وسننها

الشاعر/ فهد محمد الفهيد أبو محمد
....

حرفك قريته يافهد واسفهليت
ومن فرحتي عافت عيوني وسنها

وحاولت أجاري حرفكم لكن أزريت
وضيعت طاروق القصيد ولحنها

ياكيف أجاري راعي الفعل والصيت
اللي حياته في المعالي رهنها

وأصبحت أنا مابين ..يمكن.. وياليت
أخايل حروفٍ تقافى ضعنها

وأيست من هاجوس شعري ومليت
وعن شكركم صاب القصايد وهنها

يبو محمد في المراجل تماديت
أفعالكم صعب نقدر ثمنها

شامخ بفعلك يافتى ما ترديت
المرجلة حطت بيديكم رسنها

تقودها من حيث ما رحت أو جيت
يمناك يمناها .. وفكرك وطنها

عبدالرحمن عبدالله المجلي
...

© 2024 - موقع الشعر