الا يا مرحبا وأهلا تحياتي لكم بالعيد - عبدالرحمن بن عبدالله المجلي

قصيدة القيت في حفل أهالي محافظة مرات
عيد الفطر المبارك 1440

الا يا مرحبا وأهلا تحياتي لكم بالعيد
أبهديها لكم فرحه تخص الفرد وتعمي

لكم فل ولكم كادي وزين القول والتغريد
وأبدعي الرب يحفظكم قبل ما أقول واسمي

الآ ياعيد ياعلك على كل الحضور سعيد
تديم السعد ياربي .. وننسى الباس والغمي

دفعني الشوق و النشوة لكم أطوي فجوج البيد
أبا اصافح محياكم لعل الشمل يلتمي

وأبشكر كل من ساهم بمجهوده بلا تحديد
وأخص اللي إلى منه بدأ في لازمٍ تم

وشيبانٍ لهم منا مواجيبٍ وحبة أيد
وعنهم دوم أنا احامي ولو سيحت أنا دمي

ولا أنسى كل من شرف وجونا والديار بعيد
وكل اللي بذل جوده ومجهوده ولا اهتمي

ولا هانو ولا شانو ..شبابٍ شوق كل الغيد
لهم في المرجلة سطوة بعيدينٍ عن الذمي

تجمعتوا على عزٍ ..وشيدتوا الفخر تشييد
نماري بطيب مجناكم ..نخلي الضد ينغمي

ونبي وصل الرحم دايم ..واقول القول ثم اعيد
ترى بعض الجروح إليا قشرها الظفر تشتمي

وننسى اللي يكدرنا ولا نبغي االهموم تزيد
وكثر الهرج في الماضي تراه الموت والسمي

إلى مني ذكرت اللي فقدنا صابني تسهيد
تكسِر قلبي العبرة.. وأمش دموعي بكمي

الآ يا الله ترزقهم جنان الخلد والتخليد
وتجعلهم لنا قدوة .. نشم آثارهم شمي

وحنا للوطن فدوة ولا يغلى عليه الجيد
ونرفع دوم رآياته ولو خضنا بها اليمي

وعز أوطاننا منوة ولا نرضى له التهديد
وحب ملوكنا خلقه..شربته من حليب أمي

وعز الفرد إلى منه تمسك دوم بالتوحيد
على هذا تربينا أنا و أنت وولد عمي

تدينت الوفى منكم وجيت اليوم للتسديد
وإذا قولي عجز يوفي فخلو النقص من يمي

بلا ضمة بلا فتحة بلا كسرة بلا تشديد
معانيٍ صادقه جتكم وأغرف القاف من جمي

عبدالرحمن بن عبدالله المجلي
راعي مرات

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر