يافهد من عقبكم شفت الهلاك**وعنكم الخفاق ما يومٍ سلا

إخوانية ومداعبة بين الشاعر فهد الفهيد وصديقه عبدالرحمن المجلي عندما كان موفداً في مملكة البحرين
...

.....
....

المسافة ما تنسينا غلاك
كل يوم تزيد يالغالي غلا

وكان قلبي يابو عبدالله نساك
اقطعه وارميه لسباع الفلا

فهد محمد الفهيد أبو محمد
...

يافهد من عقبكم شفت الهلاك
وعنكم الخفاق ما يومٍ سلا

اشهد الله في محبتك وغلاك
نايفٍ حبك على كل الملا

يافهد جور الليالي ماخفاك
ذقت منها المر واسقتني البلا

ليه عني يافهد تقصر خطاك
اسعد اللي جوف شوقه إمتلا

وش بلاك تصد عني وش بلاك
والفؤاد أعلن لكم كل الولاء

عالي طيبك وعالي مستواك
والله إللي واهبك هذا الغلا

عبدالرحمن المجلي
...

سعد من في الساحل الشرقي لقاك
بين جول الغيد ربات الحلا

واهنيك لا التفت إليا ملاك
أو غزالٍ جل ربي واعتلا

وإن طرحت الشوف في هذا وذاك
شفت ما يجلى عن الكبد البلا

الضبا تمشي على الساحل وراك
وأنت (للديره) عيونك ذبّلا

ياعسى اللي يابو عبدالله عطاك
يعطي اللي عن هواهم ما سلا

فهد محمد الفهيد ابو محمد
....

يافهد إن كان هذا هو مناك
وصرت في طرد الجوازي مبتلا

ثم ذعذع نوّ شوقك في سماك
وأزهرت منها نواوير الفلا

وطاعك العمر المقفي واحتراك
وكل همٍ عن طريقك إنجلا

طيع شوري ارجع وعود وراك
قبل عنّ هذا وهذا تسألا

شاريٍ وقتك ووقتك ما شراك
ومن وراك العمر دايم يخّتلا

والملاك اللي تقول إنه ملاك
أصلها من (قمّ) ولا ( كربلا)

ما تبي شوفك ولا شوف زملاك
دينها دين الملالي والولا

شربهن ياخوي( وايت) أو (بلاك)
يرخصن اجسادهن لجل الطلا

ووالله إن ماهوب هذا مستواك
وماهي لمثلي ومثلك منزلا

فيا (فهد) إنكان شوفتنا مناك
ياهلا ويامرحبا ويا مسهلا

عبدالرحمن عبدالله المجلي
...