لا والله ألا أقفى الشتا وأقبل القيض - محمد بن دغيـّم السميري

محمد بن دغيّم السميري العتيبي
لا والله ألا أقفى الشتا وأقبل القيض

أقبل علينا القيض وأقفى نقيضه
ياعمر يامى في فوادي من الغيض

وانته تنشد خاطري وش مغيضه
إحذر تنقّض جرح شايبك تنقيض

إترك جروحي نيّها والنجيضه
ولا تحسب أني يوم أغنّي من الهيض

قلب العنا ماعاد شيٍ يهيضه
انا بعد فرقى عليّان ومعيض

من عقب فرقاهم وروحي مريضه
من عقبهم نجّضني الهم تنجيض

فرقى رجال الطيب غبن وغميضه
أبا العوض فيهم ولا من معاويض

صار العوض في الرّبع يسلم وعيضه
وأنا بدارٍ تنزع البسط وتغيض

دارٍ تغيض أهل القلوب الغليضه
مافي يدي حيله ولا معي تفويض

وهموم قلبي كألجبال العريضه
عيّت تفيد الواسطه والمعاريض

لو أنّي الحقت العريضه عريضه
ودي بسجّه قبل لا روحي إتفيض

أنحاش عن شوف الوجيه البغيضه
قلبي يحرضني على المشي تحريض

وممشاي في نجد العذ يّه فريضه
ما أبا عن السّجّات في نجد تعويض

حتى كنوز الراجحي والعويضه
© 2024 - موقع الشعر