القيض ماهوب - عبدالرحمن العطاوي

القيض ماهوب أسعد أيام ربي
اللي يحط به النداوي ورا الباب

لو يمدحه من للعذارى محبي
راعي الولع هذاك للقيض سباب

الى قامت الجوزا علينا تهبي
ونحت علينا مرزم القيض وكلاب

وقامت لهايب كل نجم تشبي
وصار الهوا من واهج القيض ملهاب

ودارت على الماء الصادرة والمغبي
وردت عريجا كلها جرد الأرقاب

دام اليماني فاهق ومتخبي
ليل ونهار الها على الحوض ظبظاب

لو يقرع القراع غصب تضبي
الجل تدحم والمخاليل هراب

لين الصبا طلعة سهيل تهبي
ترفع على اربع والهوا صار خنياب

وقام العنس في العود الأخضر يدبي
خمسين يوم وزود يومين بحساب

قام الفحل في البل هديرة يقبي
واولم على وكره يبالعيد حطاب

شفت السحاب اللي بروقه تشبي
من صيب الوسمي تبارك الى صاب

واصبحت تسمع للعوم متنبي
والحر الاشقر جاك بيدين جلاب

تشوف نايف للصقاره ملبي
وقبل امس قد روح الى الغرب نباب

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر