شفت زولٍ - عبدالرحمن العطاوي

شفت زولٍ عرض لي في مضيق الطريق
ما بعد شفت مثله بالبها والجمال

قبل اشوفه وانا من ملك مثله عتيق
وعقب شوقه ملكني بالغوى والدلال

يذبح اللي يشوفه بالقوام الرشيق
يذبح أهل الموده ذبح جند النزال

من سهوم اللواحظ صار جرحي عميق
وسحر هاروت فوق الرمش جاله ظلال

ورد خذه تلامس بالحريرالرقيق
وبين الاثنين صارت للنعومه جدال

وفي بحور المحاسن كل جسمه غريق
يخلف اللي يوصف بين عدل وميال

يوم شفت العواتق والنحر والدليق
والخواصر وردف للمسابيل شال

قلت ليتك على اللي فالضماير تويق
وتستبين المحبه ياصعيب المنال

قال ما احب قلب فيه جرح عتيق
ان تجدد تذكر ما ضيات الليال

يوم ننصب محابيل الهوى للطليق
لا تشربك بحبلي وانت بيدك حبال

قلت يا طيف هيفا رد ليتي ماافيق
حبب النوم عيني شوف هاك الخيال

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر