هذه القصيدة موجهه من الشاعر عايض بن شقيربن عتيق المرشدي للشاعر سعدون بن فهد الهرس
يالهرس يوم انت عندك فالهوى خبره
وجربت يالهرس حلو العشق وامراره
بالله ياصاحبي قلي وش الدبره
انا توهقت به واصارع اخطاره
يلعب بي الموج وانا الخوف ماعتبره
وتعبت يديني وانا اسبح ضد تياره
باسباب من حطني لاهل الهوى عبره
سيطر على القلب واحكم فوقه حصاره
لا لد لي بالنظر قلبي فقد صبره
والعلم ضيعت ميراده ومصداره
اقف مكاني تقول مخدر ٍ بابره
اغيب وافيق والاعصاب منهاره
احن وارزم وعيني تذرف العبره
والجوف من عام الاول ماطفت ناره
كني عليل ٍ هله قد جهزوا قبره
يشوف موته قريب اقرب من زراره
العلم يالهرس ياكبره وياعبره
والراي عندك وشرواك استمع شاره
اما انك افزع ومثلك طايل ٍ شبره
والا القبر يابن عمي ناد حفاره
وهذا رد الشاعر سعدون بن فهد الهرس على الشاعر عايض بن شقيرالمرشدي
عايض مويق ٍ على غور العنا سبره
وانا ليا كبرت القاله من انصاره
كل القلم في وجوبه وانتها حبره
من كثر وصفه لجور الحب واكداره
للقلب خفقة وله والصوت اله نبره
منهن تعرف الغلا وتعرف مقداره
يابن شقير انتبه للعضم والهبره
قبل السهم يستجل القلب وستاره
العلم نوعين يازينه وياغبره
وانت ابخص الناس فيه وعندك اخباره
مانيب ناشدك عن صغره وعن كبره
لوكان الا فكار في ماقلت محتاره
ان كان قولك بمن يخبرك وتخبره
على النقا عامر بالحب تذكاره
جيتك بجمع يشوق المشتقي زبره
شيخان اهل نجد بدايه وبذاره
نرضيه بالمال عنك ونرضي الخبره
اللي تمثل حماه وتعرف اسراره
وليا عصا الترف مانقدر على جبره
الحرب ممنوع والحكام قهاره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين