كل حي ٍ على الدنيا يذوق المـمات - سعدون بن فهد الهرس

كل حي ٍ على الدنيا يذوق الممات
لوتوخر مصيره يلحق الراحلين

ما يعود الزمان بسالف الذكريات
تطوي العمردورات الزمن والسنين

مات عبد العزيز مروض المعجزات
وايلي ٍ على ماقيل دنيا ودين

مالنا عنه غير الصبر عقب الفوات
والعباير تخفف لوعة الصابرين

ارخصي يالعيون دموعك الغاليات
واجهشي يالصدور بكل ماتحتوين

واحزني ياقلوب ٍ بالفرح ظاريات
وانتهي عقب حزنك منه لا تحزنين

ليت للنايحين وليت للنايحات
دعوة ٍ مستجابه تحيي الميتين

كان والله لندعي دعوة اهل الثبات
جعل ما تكثر الاجداث بالطيبين

ميرمايبقي الا عالم الخافيات
والقضا والقدر فرض ٍ على العالمين

من عزيز الجلال مكوّن الكاينات
راحم المسلمين معذب المشركين

والعرب ترفع البيضا على النايفات
للكريمين والشجعان والمحسنين

كم دريك ِ برك بحموله الجايرات
ماقدر يحتملهنه ولا له عوين

راح لتويجري ٍ عنده الكايدات
كنهن شربة الفنجال في كل حين

نادر ٍ فالمواقف يكسب الطايلات
صيرمي ٍ يخلي كل قاسي يلين

يرتكي للحمول وينطح الواجبات
للا رامل وللا يتام حصن ٍ حصين

في عيونه تهون وتصغر المعضلات
مثل ماتصغرالذرات في كل عين

ينضرالمقبلات بنضرة المقفيات
بالتعامل مع الاحداث ماله قرين

ينقض الواردات ويفتل الصادرات
يفعل الطيب فالمقفين والمقبلين

يرضي اهل الوقارويرضي اهل الشمات
ويتجاهل خطا الاصحاب والبايرين

ماحداه الجهل وعصوره الغابرات
دارس ٍ سيرة التالين والاولين

ناهل ٍ من نهر دجله ونهرالفرات
من تراث العرب عنده رصيد ٍ ثمين

يعترف بالصحيح وينكر والواهيات
عالم ٍ يعلم التاريخ علم اليقين

خاض الاكوان يوم الخيل والموجفات
من ضفاف الخليج لبحر جده تكين

مرة ٍ مجنبات ومرة ٍ مشملات
تحت عصمان الاريا طايلين اليدين

كل موعزمعزي جات معه ازرفات
ينصرالمستجير ويدحر المعتدين

لين وحد ولم الشمل عقب الشتات
وارتحل واستمروعقبه الخيرين

في ولاية عياله فاقت الباهيات
ديرة المصطفى واصحابه الصالحين

خلو المملكة تختال بالمغريات
عانقت كوكب المريخ والفرقدين

لين وصلت لعهد مكمل الموجبات
كافل القاصرين مطوع العابثين

ولبست له جديد اللبس والغانيات
يجرحن الشعورويفرحن الحزين

واحتضنها ابو متعب عقب راحت وجات
فالولايه من المامون عند الامين

شامخ ٍ ماتهزه صوكة العاتيات
فالملمات للصوكات جنبه متين

يوم دعوى العميل وراعي الموبقات
عاندوه الكباروعودو صاغرين

معه فالاولات ومعه فالتاليات
مخلص ٍ مايخون وينبذ الخاينين

ترتخي لا بوعبدالمحسن العاليات
يمتطي كل عليا والمهيمن ضمين

والتحق مع صفوف العالم الفانيات
رافق اللاحقين بمنهج السابقين

والعوض فيه سته حازوالمرضيات
من فضايل قرايح منهله ناهلين

جددوبالوقارفعوله الماضيات
كن ابوهم على الدنيا من العايشين

ياالله انك تفرجله من الموحشات
وادخله روضة الجنه مع الخالدين

جعل قبره عليه تسبل المرزمات
لين يمسي ويصبح روض عقب الغشين

© 2024 - موقع الشعر