قصيدة ترحيبية

الا يالهاجس اللي لك جموح، وصلفةٍ، وصهيل
وعلى بدع البيوت الفاخرة لك صولة،وجولة

تجيب النادرة، بنت الفكر، ومفصلة تفصيل
على قد المهمة من صميم القلب مفتولة

تليق، ولا تليق الا على ضيوفٍ غلاهم حيل
بهم تبقى مداهيل الضلوع الحدب مأهولة

ضيوفٍ قدرهم متعليٍ فوق الجدي، وسهيل
علي اللازمة يرقى بهم قدر الذي جوا له

ضيوفٍ حافظينٍ للعهد؛ لو الظروف تميل
وفاهم ثابتٍ- مع دورة الايام- مفعوله

ونيابة والنيابة عن عزيز، ووافي، وحلحيل
كريمٍ تضرب الامثال في فعله، وفي قوله

ندي الطبع، سمح الخلق، وفالشدة شديد الحيل
وعنده كايدات، ومعضلات الامر محلولة

ابن مصلح فريد النوع، فارس معدلٍ للميل
على سلم المراجل في محلٍّ يصعب وصوله

وعن راع الفعول اللي تضوي كنها القنديل
عريب الساس، ماهر للمواقف مسرج خيوله

يشيل الحمل يوم ان الحمل ما له يكود شعيل
كذا طبوعه خلقها الله على الصملات مجبولة

هلا باللي مشرفنا ونورنا في مسا هالليل
ولبى الدعوة بصادق شعور ووجه رحوله

تحية تمتزج بالود، واعذب من مياه النيل
وارق من النسيم وعنها الأشواق مسئولة

نبادركم بها لهفة تفوق الوصف والتمثيل
دواعيها وفا لاهل الوفا بالعطر محمولة

هلا يا مرحبا ترحيب بدوٍ في قدوم السيل
ترجل من سحابٍ داعب الاقطار هملوله

وشكل فالثرى زهرٍ مثل تاجٍ من الاكليل
تمدرى (قحويانه) فوق (شيحٍ) مجتمع حوله

هلا يا مرحبا ترحيب بالمجمل، وبالتفصيل
تعابيرٍ من الضرسان للضيفان موصولة

ش/ طلال عويض مصري الضريسي الهجلة المطيري