ربوع الشمايِلْ

يا قيل ؛ ناسٍ..من ربوع الشمايِلْ
أشوف ؛ فيهم..لبسهم لِلْعْقَالي!

يسار أو يمين؟.. بالحيل ما يِل
من حينْ ؛ أشوفه أعرف إنّه شمالي

وأشوف ؛ فيه أنبل كرام الخصايل
ما أشوف ؛ في غير العْقال ؛ الميالي

من الْحَد؛ لين العاليةْ: نجد حايل
أم الجمالْ؛ وكل معنى الكمالي

وجبال شمر ؛ ما تبي قول قايل
وش عاد غير النعم فيها يقالي؟!

لها ؛ وفيها ..من يشِد الرحايل
كنِّه ؛ لبيت الله شَد الرِّحالي

ولأهل الوفاء ؛ فيها مقالْ وفَعَايل
تضربْ ؛ بها الأمثال ؛ بين الرِّجالي

اللي ؛ يشيلون الحمول الثقايل
في كلْ؛ معنى الْهَم ؛ والإنفعالي

فعايلٍ؛ ما بين صايلْ ؛ وْجايل
حاتم؛ وعنتر وأبا زَيدْ ؛ الهِلالي

وأهل الكرم مروين حدب السلايل
وكريم سبلا ؛ في كريم السبالي

وابن رشيد ؛ اللي لطم كل عايل
فعايله ؛ تشفي قلوبٍ علالي

وأجا وسلمى..الخالدين الأوايل
لو كان ؛ ما فيها من الناسْ ؛ والي

ويا ما ؛ بها من نافلاتْ النفايل
نفودها ؛ وسْهالها ؛ والجبالي

وأسماءْ الحمَايل..بين ذيك؛ القبايل
في رَبعةٍ ؛ من حولها السيل ؛ سالي

رَبْعٍ ؛ من اللي يأصلون ؛ الصُمايل
يشربْ بهم فنجالْ ؛ بيضْ الدِّلالي

ميزانهم؛ عن كلْ قاصرْ ؛ وطايل
ما في ؛ حروفِه عِلِّةٍ ؛ واعْتِلالي

في ذكرهم ؛ يهِيْض معنى المثايل
من كلْ؛ شيءٍ فيه سابقْ وعالي

عسى ؛ لهم شأنٍ عزيز الوسايل
وحظ ؛ لهم بالعز يمشي عَدَالي

وبديارهم؛ تنْشي مزون المخايل
في صورةٍ ؛ تفوقْ ؛ حَد الخيالي

بالدافقْ الرافقْ .. تهلْ الهمايل
على ربوع ٍ؛ شوفهم ؛ شَفْ بالي

من العاليةْ:حادور سَيْلْ المسايل
بالصافي؛ العذب القراحْ الزَّلالي

ينساحْ ؛ فيها ظلْ شمسْ القوايل
وتلبَس ؛ جدايدها الجرود السِّمالي

وتأتي؛ لها عقبْ الرحيلْ ؛ النزايل
على ؛ حِلو نُوارْ .. ذِيْك المفالي

وأنا لها ؛ ولهان ما ارسل رسايل
أجي لها ساري سريع الوصالي