ربوع الشمائِل

يا قالوا: ناسٍ..من ربوع الشمايِلْ
أشوف ؛ فيهم..لبسهم لِلْعْقَالي!

يسار ؛ أو يمين؟.. بالحيل ما يِل
من حينْ ؛ أشوفه أعرف إنّه شمالي

وأشوف ؛ فيه أنبل كرام الخصايل
ما أشوف ؛ في غير العْقال ؛ الميالي

من الْحَد ؛ لين العاليةْ:نجد حايل
أم الجمالْ؛ وكل معنى الكمالي

وأجا وسلمى..الخالدين الأوايل
لو كان ؛ ما فيها من الناسْ ؛ والي

لها ؛ وفيها .. من يشِد الرحايل
كنِّه ؛ لبيت الله شَد الرِّحالي

لأهل الوفاء ؛ فيها مقالْ وفَعَايل
تضربْ ؛ بها الأمثال ؛ بين الرِّجالي

فعايلٍ ؛ ما بين صايلْ ؛ وْجايل
حاتم؛ وعنتر وأبا زَيدْ ؛ الهِلالي

وكريم سبلا في كريم السبايل
وابن رشيد ونافلين السبالي

اللي ؛ يشيلون الحمول الثقايل
في كل ْ؛ معنى الْهَم ؛ والإنفعالي

ويا ما ؛ بها من نافلاتْ النفايل
نفودها ؛ وسْهالها ؛ والجبالي

وأسماءْ الحمَايل..بين ذيك؛ القبايل
في رَبعةٍ ؛ من حولها السيل ؛ سالي

رَبْعٍ ؛ من اللي ياصلون ؛ الصُمايل
يشربْ بهم فنجالْ ؛ بيضْ الدِّلالي

ميزانهم ؛ عن كلْ قاصرْ ؛ وطايل
ما في حروفِه عِلِّةٍ ؛ واعْتِلالي

في ذكرهم ؛ تسمو معاني المثايل
من كلْ ؛ معنى بالنواميس عالي

يا علها ؛ تنْشي مزون ؛ المخايل
في صورةٍ ؛ تفوقْ ؛ حَد الخيالي

بالدافقْ الرافقْ .. تهلْ الهمايل
على ربوع ٍ؛ شوفهم شَفْ ؛ بالي

من العاليةْ:حادورْ سَيْلْ المسايل
بالصافي؛ العذب القراحْ الزَّلالي

وينساحْ ؛ فيها ظلْ شمسْ القوايل
وتلبَس ؛ جدايدها الجرود السِّمالي

وتأتي؛ لها عقبْ الرحيلْ ؛ النزايل
على ؛ حِلو نُوارْ .. ذِيْك المفالي

واللي على فرقاه ما له محايل
ويعيشها معشوق ماله مثالي

يهنا بها ما هو يدز الرسايل
وعلى هواها يلعب الهمَّلالي