لذّة التوت .!! - صالح بن عمار

يقسى علي الشوق واناظر الموت.
واحيان اتمتم بالقصايد وصيه.!!

متى تنادينا المشاعر.! مع الصوت.
متى تلمّك مع وَلَهنا .... ايديه.!!

صاح الغلا والود والباقي اسكوت.
مع الحنين اللي ملا الصدر فيّه.!!

صدري مجره للمشاعر ... وتابوت.
لا صد قلبه .! قلت وده ضحيه.!!

ماياكل إلاّ ...... مهلبيه وبسكوت.
وكيف الحلا بالله ياكل ... حليّه.!!

وشلون نروى التوت .! يالذّة التوت.
دام الحلا في مبسمك والثنيه.!!

يازين لو من دونك القرش والحوت.
اجيك ..! وازنود الهواوي قويه.!!

شفني اصب الود في عدة ابيوت.
الكاس عينك.! والمعاني هديه.!!

غصن الوله.!! وراه يازين محتوت.
وليه الربيع ... يمنّ ورده عليّه.!!

لا غاب زولك مدي الروح بالصوت.
صوتك يخفف من عناها شويّه.!!

مثل العواجي لا توجد على نوت.
والاّ الملوّح في هوى العامريّه.!!

قمت اتوجد بالغلا .! ساعة الفوت.
واللي جنيته ...! حرقةٍ داخليه.!!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر