مشاركة في حفل 7 - سيف الهويملي

الراس شاش بمحفل ابن معيلي
وقريحتي في حينها مستعده

إليا نويت بيوتها تستويلي
والصافي اللي منتقيته . تعده

ماكل سيل يضيق فيه المسيلي
لو كان مصدر المزن برقه يقده

الحفل حفلي والعذر مايحيلي
لو كان بالدمام وانا بجده

واعيال عمي كاسبين الجميلي
اللازم اليا بان . فيهم مسده

هوامله حامين جار ودخيلي
تاريخهم ديوان الامجاد عده

عنهم نيابه بالكلام الجزيلي
يامرحبا ترحيب فخر وموده

ترحيب فيه من النسيم العليلي
وازكى من الكمبود فوحه ونده

واوضح من البراق وسط المخيلي
واصدق من أرخى ثعول نوّه بشده

ترحيب مهما زاد يحسب قليلي
بأهل الوفى والطيب واهل الأشده

اللي تعنوا من مسير ٍ طويلي
واللي حضر من ديره وبده

وافين والتشريف هذا دليلي
راع الوفى مافيه عذر ٍ يرده

لو يمشي بصبحه وياصل بليلي
ماشال هم خطوطه المجرهده

يامرحبا واهلا ً هلا ختام قيلي
( وهذا قصيدي وافتخر يوم أعده )

© 2024 - موقع الشعر