وقع هملول

مافيه وادي شعر ماهو بمدهول
وزهور ريضان القصيد اقطفوها

ناسٍ بإثرهم روّحت كنها امحول
وهم روّحوا عنها ماتقل ادهلوها

لو كان مافي وقتهم كثرة سيول
إلا انهم بالدرب ماميلوها

وانا بصدر عوبٍ تصول وتجول
كتبتها من واقعي واسمعوها

منهاجها للي على الطيب مجبول
فيه المراجل كل ربعه لقوها

ويشهد بها نايد عرب يصدق القول
لي الفخر به يوم فيه اذكروها

ابن معيلي باللقى سيف مسلول
تفخر مزينه بالكفو كلبوها

يابندر معيبد لك القاف مرسول
فيه الحروف البيض ماحرفوها

من هاجسٍ ينقض فتل كل مفتول
ويبين للي بالخفايا افتلوها

اللي على راع الوفى عيونهم حول
وان مالقوا زلةٍ ركبوها

الناس لو تمشي على غير مدلول
ان كان نيران المشاكل وطوها

مير الرجال الواعية تملك عقول
ويقدرون الكلمه اليا انطقوها

ولا عليهم من حكي كل مبدول
اللي عيونه بالرياجيل شوها

الجسم صاحي لكن العقل مشلول
وعقول تِبّاع المهابيل . بوها

راع الحسد يفرش لك الارض بزلول
ويقول هذا طيحته دوروها

لكن جهوده روّحت دون مفعول
ونفسه شياطين الهوى بركوها

جتك البيوت الغر من وقع هملول
والباقية في حينها إليا بغوها