الذيب بطويق

لـ سيف الهويملي، ، في العتب والفراق، آخر تحديث

الذيب بطويق - سيف الهويملي

ما اردى من اللي يحسد الرجل في طيبه
إلا الذي مايقدّر من تعنوله

ظنيت يستقبل ضيوفه بترحيبه
لكن صدق من يقول الظن له فوله

كنت احسبه ذيب في عالي مراقيبه
يالين قدام عيني بانت فعوله

الذيب بطويق والثعلب بأشاعيبه
يطرد ظلاله وظله يدّرج حوله

من لايعرف الخساير من مكاسيبه
خسايره في ليال العمر مدبوله

الضيف . معروف من يجهل مواجيبه
من قبل عشرين قرن العالم تقوله

والشعر له هاجسٍ يوفي مطاليبه
سيفٍ يشرف وطب الجرح مسلوله

من قدره بقلبي اقدّر متى اجيبه
لو كان بالصدر له صوله وله جوله

من دونه الصدر مغلقةٍ دواليبه
والأيدي اللي تحرث النار مشلوله

اللي وقع في محيط الشك والريبه
من دونه الشمس فوق الارض محموله

لايحسب انه يمن بكم تركيبه
الوقفة اللي منه ماهي بمقبوله

ولا احدٍ تجوّد بقوه في تلابيبه
يكتب حروفه ويمسحها بمدلوله

العاقل اللي فعول الشينه تعيبه
والجاهل اللي بها يمشي على طوله

يوم الجبل عالي القمه عواء ذيبه
مافيه عقدة حبل ماهي بمحلوله

من عوية الذيب راس الخبل وآشيبه
صف أربِعه يوم ماشالنه ارجوله

ودخل له ببيت يستجدي به الهيبه
يبي يرد النفس يوم انقصر زوله

ابختصرها وسري مابحث غيبه
إلا ان كفي عن الرديان مغسوله

الله يدوم الذي دايم بترحيبه
ويغيب من يقصر بفعله وفي قوله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر