مرثية بالشاعر / عبدالله بن زويبن الحربي رحمه الله - سيف الهويملي

للحزن بوجيه الليالي مقاسيم
اللي تجلّى غيبها في وقوعه

هول الفواجع وقعها يصحّي النيم
ورمح القدر مايمنعنّه دروعه

على حزن سابق كسى جوّنا بغيم
يوم الحويفي بدر قفّت نجوعه

ضيف القدر ماينحسب له بتقويم
لادقّة الساعة تعلّت بطوعه

روحٍ لها بسجل الايام ترقيم
وقتٍ محدد والمنايا بتوعه

ودارت رحى الدنيا وحنا مصاويم
واقفت بحرٍّ نادراتٍ طبوعه

عبدالله زويبن حفيد الاكاريم
الشعر من عقبه تهامل دموعه

مالي على الشعار . سلطة . وتقييم
لكن من اوحى شعره اطرب سموعه

يالله عساه بجنّةٍ ذات تنعيم
ويقطف ثمر داني تدلّت فروعه

ويحسن عزاء شعرٍ بدى يجرع الظيم
ويحسن عزاء اهله كلهم مع اربوعه

© 2023 - موقع الشعر