أنين الناي - آمال محمود كحيل

أنين الناي
بقلم
آمال محمود كحيل
 
تعبت كتير من الأحزان
من الوحدة اللي سكناني
من الغربة اللي جوايا
ومن إحساسي بالحرمان
ومن صمتي
ومن ذكرى
بتسحق ألف ميت فكرة
وتنفيني
معاها ف هوة النسيان
يا ريت تسلاني لو فترة
عشان خاطر تريحني
يا ريت ترحمني من نظرة
بتحرجني
وتجرحني
بتسألني .. ليه الحسرة
بقت سكين بتدبحني
وليه الضحكة خاصمتني
وليه الفرحة عاندتني
وليه اليأس توهني
وخلاني أخاف بكرة
ما تسألنيش
 
 
ما تسألنيش كرهت الدنيا
ليه وازاي؟!
وليه مهمومة ليل ونهار
وليه قلمي نسي الأشعار
وليه جف المداد جواه
وليه رعبي من اللي جاي
وليه باحبس في جوفي الآه
وليه عودي دبل بدري
وليه جايز في يوم انهار
وليه دابت خيوط صبري
وفاض دمعي
كما الأنهار
ما تسألنيش
 
 
أنا بارفض أكون شكاي
لكن نفسي أكون نساي
واعيش زي البشر واضحك
ونفسي اجري
ونفسي اقدر
من الطوق اللي في رقبتي
في يوم اتفك
أنا المشنوقة أفراحي
بحبل الغربة والترحال
وأنا المخلوقة
من صغري
بانام واصحى على بركان
وخوفي لشوفني يوم تايهة
بدون مأوى ولا عنوان
وحيد منبوذ بين الخلان
وانا ف عينهم
ضعيف وجبان
يا خوفي لبكرة ألقاني
ضحية قهري وسكوتي
وبين أشلائي .. أنساني
وتنسى انت
سبب موتي
ساعتها وبس ليك تسأل
وهايجاوبك صدى صوتي
ولو ما وصلش ليك إسأل
وهايجاوبك أنين الناي
© 2024 - موقع الشعر