موش باحبك - آمال محمود كحيل

موش باحبك
بقلم
آمال محمود كحيل
 
موش باحبك قلتهالك
وف عيوني الحزن باين
أيوه باكدب غصب عني
والله جوه القلب ساكن
كل نبضة تقول بحبك
رغم إنك كنت خاين
سيبتني لحيرتي وعذابي
فتني لشكي وظنوني
وادعيت حبك لغيري
لاجل ما تقيد نار جنوني
مانت عارف إن غيرتي
نقطة الضعف اللي فيَّه
ليه تبص لحد غيري ؟
أو تغازل واحدة تانية
لو صحيح همَّك سعادتي
يبقى ليه
بتهين مشاعري ؟
ليه بتتسلى بعذابي
ليه بيغريك فيَّه صبري
إني أتحمل قساوتك
م النهارده ، صعب جدًا
إني اتحمل جنونك
مستحيل ...
مبقاش دا ممكن
جي تقول دلوقتي نرجع ؟
لا حبيبي ما عادشي ينفع
مش عشان
ما بقيتش احبك
لا عشان ما بقتشي أقدر
© 2024 - موقع الشعر