ف جرة قلم - آمال محمود كحيل

ف جرة قلم
كلمات
د/ آمال محمود كحيل
 
 
لحظة وداع
والحب ضاع
حب السنين دي كلها ف جرة قلم
أصبح عدم
أيوه انتهى ، أصبح سراب
والقلب تاب
وعيونَّا بكيت م الندم
وقلوبنا فقدت نبضها
والقسوة قتلت حسَّها
وفضل الألم
مين انظلم ؟
مين اللي ضيع حبنا ؟
إنت ؟؟؟ أنا ؟؟؟
ما اعرفش بس اللي اعرفه
طعم العذاب
لسعة حنيني ، وانتظاري
ولهفتي ف ليل الغياب
واشتياقي وطول سهادي
وحيرتي ودموع
قلب داب
يجوز فتورك أو غرورك
يجوز عنادك أو عنادي
يجوز نصيبنا تدوب قلوبنا
وإيه يفيد بس العتاب ؟
مين اللي كان هوه السبب
مايهمنيش
قدر انكتب فوق الجبين
وف لحظة مات
فينا الحنين
عدت سنين ،
وانا لسه بافتكر اللي فات
وباحس شيء جوايا مات
يمكن يكون
حلمي اللي خنته بالسكات
يمكن يكون
أملي اللي تاه في الذكريات
يمكن يكون
قلبي أنا
أصبح رفات
!
© 2024 - موقع الشعر