ماليش في الدنيا دي غيركم - آمال محمود كحيل

ماليش في الدنيا دي غيركم
بقلم
آمال محمود كحيل
 
ماليش في الدنيا دي غيركم
يا أهلي وأوفى خلاني
دانا بيكم ، وانا منكم
يا ماليين كل وجداني
وانا في الكون دا من غيركم
باضيع ، واغرق في أحزاني
وفي غيابكم يتوه فكري
وبانسى حتى عنواني
ومين غيركم يا أحبابي ...
ساندني ، وعلَّى بنياني ؟
ومين طبطب على اكتافي
وكان في النوة مجدافي
في وقت الكل فيه بيبيع
سقيتوا ف قلبي أحلامي
في غمرة يأسي
قدتوا شموع
ورجعتوا الأمل تاني
وكنتوا معايا وسط الريح
وكنتوا ف ضعفي لي القوة
وبلسم شافي داوى جروح
وجفف دمعي في عينيه
يا أغلى الناس
دا إنتوا الروح
وإنتوا النبض في عروقي
ولو هاتضيق معاني البوح
يصرَّح باللي بِي شوقي
باناجي الباري يحفظكم
وتلهج بيها أنفاسي
أنا منكم ، وانا ليكم
وإنتم ضي نبراسي
في سري ساعات ، باناديكم
واقولها بصدق إحساسي
ماليش في الدنيا دي غيركم
يخفف حزني ، و يواسي
يا رب يديم لي صحبتكم
دي تاج شايلاه على راسي
يا رب يديم لي صحبتكم
دي تاج شايلاه
على راسي
© 2022 - موقع الشعر