جنازة غلا

هذي رساله .....! معانيها معانينا.
مرسولها يرسم اللي شافته عينه.!

يافاتنه بالشعر ... طابت مسارينا.
خطيت خطٍ قريته ... قبل تقرينه.!

شفت المراكب تسابقني على المينا.
كم مركبٍ جاك / كم مركب تنادينه.!

مادام مرسى المراكب في مراسينا.
ينعاف لو تزرعينه لي وتسقينه.!

انا عطيت الغلا ... وانتي عطيتينا.
وردٍ ذبل في يدينك ... قبل تهدينه.!

مادام قلبك ...... غلط بين المحبينا.
ابك الغلا لو نشدتك كيف تعطينه.!

سؤال محرج ..! زرعته بالبساتينا.
يبقى معك من دموع العين تروينه.!

باشوم عن طرد ودك .... لو تودينا.
ولو تنشدين الملا وين الغلا وينه.!

في طيحة القلب ماطاحت مبادينا.
طيحة غلا.! والزمن تذبح سكاكينه.!

اخر عهد .. يوم وضينا .. وصلينا.
على جنازة غلا ... تكتبني اسنينه.!

مات الغلا ..! والكفن ذكرى ليالينا.
والقبر في مدخل الشريان تلقينه.!