الشام وفلسطين

النوم سلطان بعيون السلاطيني
ياواهني من عيونه ذاقة الغفوه
 
عيّا يحل الغفا في جافن العيني
اسهرني الهم لين اشرفت للنبوه
 
عديت من فوقها من جور مافيني
ماني من اهل الهوى تبّاعة النسوه
 
همٍ لجا بالفواد وقام يشقيني
بسبابه اصبحت اعيش ايامي بقسوه
 
شح الحيا وامحلن خضر البساتيني
مالي جدى غير ربٍ نرتجي عفوه
 
خابرك ياللي تبا العليا من اسنيني
وين انت ياباغي العليا من الهفوه
 
شفنا هل الدين قامت تهمل الديني
واللي نهقابه يضيع وضيّع الهقوه
 
ماقول مافيه مسلم واحمر العيني
الذل ذل النفوس وجفوة النخوه
 
الشام قد شردو فيها المقيميني
يلفحهم البرد عقب النار والدفوه
 
ضاع الامل وابتسامات البزاريني
واعراض اهلّها تهتّك قدمنا عنوه
 
الشام راحت مثل روحت فلسطيني
وحنا من اللي جرى مانقْدم بخطوه
 
خذلان الأنفس من اسباب الملاعيني
اللي تدوّر في دين اسلامنا الفجوه
 
حطو على الشرع دستور وقوانيني
ومن لا تقيّد بعين الغرب به نزوه
 
الغرب يومي علينا بالسكاكيني
وحنا فلا فينا من به صحوه ونشوه
 
ياالله بيديك ترجيح الموازيني
يامن جعلت الصحابه خيرة الصفوه
 
انصر هل الدين بالغر المياميني
واجعل لنا صحوةٍ من عقبها سطوه