على صدرك كتبتك في طرف شاطي بحر مهجور
أميز وسط موجه بين تفعيله وتفعيله

كتبتك سحر في كفٍّ وفي كفٍّ قريتك نور
وْصنعتك قارب المرسى وقلم فكري معاني له

وْنثرتك عقد في صدر البحر واناظر المنثور
ابسحربك بحر يرقى به المعنى ويسديله

وْغدربي وانقلب سحري علي وصرت انا المسحور
ركبت البحر ثم قامت تلاعب بي محابيله

غيوم وموج في ظلمى غدت بي شاعرٍ مأسور
غدت بي وقت اصارعها نهاره لي مثل ليله

وقف بي وقفة المتكبر المتغطرس المغرور
وْنظر نظرة سؤالٍ وش تبي قلي وانا اشكيله

ألا يا بحر جاوبني علام الشعر فيه قصور
علامه ما يهيضنا ولا تطرب مواويله

علامه مثل قرناس الجبل وقت الهدد معثور
قعد مغبون ما بين المصيد وبين تحصيله

سبب خبلٍ يشوف الصيد واطلق طيره المكسور
جهل مدري غشامه بسّ مدري ويش تأويله

تنهّد واستدار ولملم الموج وعطاني شور
يوصيني بشعر آباي واجدادي يا عزّي له

يقول الشعر درة والدرر منثور جوف بحور
تدرّب كان تبغاها على الغوص ومواصيله

وْعلى الأطلال ياقف بي نرى تاريخنا ف سْطور
وْشكينا شعرنا الحاضر على الماضي ونرثيله

وْعرفت انّ الشعر راقي وباقي لو تزيد عصور
وْعرفت انّ السبايب فيه جاته من رياجيله

أحد همّه يجي شاعر وحد همّه يبى الجمهور
وحد ما همّه المعنى وحد تكثر مداخيله

على اهل الشعر محسوبين مثل الكسر جا مجبور
كمل فيه العدد واحد بعد ماتم تعديله

معاني الشعر مثل الخيل ما تنجح مع المذعور
تبى الفارس تجي يمّه كما تشتاق له خيله

وْكما العالي من جبالٍ شواهيقٍ عليه صْقور
ولا تْهمه طيورٍ حايمه حوله واسافيله

الا يا الشاعر ان كانك تبى المعنى يجي مسخور
تخيّر فالسمين مْن المعاني عن مهازيله

والا يا السامع القاري تراك الناقد المخبور
عليك الحق في نقدك ولا تنشد لمن هي له ؟

نهاية قصتي فيها الفخر والشعر بي منصور
ومن مثلي على المنهج تمثل في تماثيله


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر