المبسم الحالي - عبدالعزيز الشاطري

الحب روض وفايض الشوق راويها
غنت عصافير الهواوي على غصونه

يشكي وصاله حيل والقلب ناويها
والشوق يقطع فالمسافات من دونه

اشجان في قلبي ولاني بقاويها
واشواق في وسط الشرايين مدفونه

مالوم قلبي كان للريم هاويها
تهدّمت من زينها كامل ركونه

دايم تحرّاني وانا في حراويها
والوقت مايرحم والاعمار مرهونه

لا شفتها اجرح فالمشاعر واداويها
ملاك .. منها باقي الغيد مغبونه

مكحولة العينين والرمش ياويها
يرسل رماح الحب للقلب مسنونه

والخد لفصول السنة دوم حاويها
في كل فصل يغيّر الورد من لونه

والمبسم الحالي يحلوي حكاويها
اليا حكت غطّت على الجوّ ملسونه

والعنق عانق هامة العز قاويها
اليا انثرت سود الجدايل على متونه

والنحر بانواره ملا الكون ضاويها
والصدر مزبور يتضايق من ردونه

رمانتين وروسها الشوق شاويها
تسبق مراسيل العشاشيق مفتونه

والخصر ضامر كنها الجوع طاويها
والردف راهي والمعاليق مشطونه

اليا اقبلت عجلة ولااحدٍ يساويها
مقدم بانوراما على مسح طبلونه

وليا ادبرت تثاقلت في خطاويها
خلفية الفكسار يمشي على هونه

ظبي الفلا ياجعلني من فداويها
مديون انا لها وهي ليّ مديونه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر