الحب مرّ وحلو - عبدالعزيز الشاطري

الحب مر وحلو ما بين الاحباب
حلو التلاقي والغيابات مرّه

ليت المحب يشوف خله ليا غاب
من شان ما يونس من البعد حرّه

لو العيون تصوّر الخل بكتاب
بين المحاجر كل وقتٍ تمرّه

والله لْتذوب المرارة فالاهداب
وْيبقى الحلا كحلٍ عليها تذرّه

ياويل قلبي شبّ بالحب لو شاب
يتعب ويشقى فيه والوضع سرّه

يشكي حبيبه من جروحه ولا تاب
يزداد حبه لو جروحه تضرّه

كله سبايب ضحك مابين الانياب
من مبسمٍ غالي عليّه مقرّه

ظبي الوضيحي بين تلعات الارقاب
تفرق عن احلاهن ليا قيل درّه

قلبي لها قصر وضلوعي لها ابْواب
من وين ما تدخل لها القلب جرّه

كلي فدا للترف والحب غلاب
يفرّ قلب العشق مليون فرّه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر