يابو سلطان

عزي لقلب يبو سلطان مهموم
القلب يبن قرين مني جزوعي

ياتركي ابن قرين تراي محروم
ماذقت في عمري وناسة سبوعي

ايضا وعيني حاربت لذة النوم
اسهر لحالي والقبايل هجوعي

ونيت ونة من عن الديد مفطوم
امه توفت ماكملت له سبوعي

او ونت اللي كل ربعه غدو قوم
وعنهم جلاء ماعاد فكر برجوعي

بسباب همن بالحشا دايم الدوم
هم منه قلبي غدالك مزوعي

انخاك ياتركي ويومك هو اليوم
يامطوع اللي يلبسون الدروعي

انخاك ياشيخ لك الصيت وعلوم
علومك تنومس شمر بكل نوعي

ولقالات شمر والمهمات مفهوم
في صف شمر ماتاْخر بتوعي

ويا كم اسيرا داخل السجن مكتوم
فكيت ياقيده ياشريف الطبوعي

ياشيخ منهاجك على الطيب مرسوم
الناس طيبه شبر وانته ببوعي

شيخ ولد شيخ قديم والى اليوم
ونفسك عزيزه ماتداني الخضوعي

ايضا وباب البيت ماقيل مردوم
رفضت صك الباب بشده منوعي

ولك مجلس دايم به شيوخ وقدوم
فيه النشاما مولعين الشموعي

هرجن غسل مافيه نمه ولا لوم
فيه النشاما بالسوالف سبوعي

ودلال مايشراء له الهيل باليوم
تبهيرة الدله تكفي سبوعي

وصينية ايضا بها الزاد مرجوم
من اطرافها للقاع سمنه يموعي

الشيخ تركي مايحب فيه مزحوم
ياقال قول تم ماهو خدوعي

لا يابعد من شيخته جسم وهدوم
اللي ليا جيته نخيته يفوعي

ومن خلقت الدنيا فلا يطلع الدوم
والحنظله ماقيل منها نفوعي

وانا ترا ياشيخ ولا به على لوم
مالي سوا فزعتك والله فزوعي

وانا نخيتك مابها اليوم مثلوم
انتم هل الفزعات وانتم ربوعي

وصلاة ربي عد ماتنشي غيوم
على الرسول اللي لخلقه شفوعي