اذا جرحوني صحت سلطان سلطان - خلود الهاجري

سلطان ياللي تدبل الكبد سلطان
يااوطى بشر شفته انا بالخليقه

كانك تحسب اني انا لك غلطان
والله مااجلس بين حظنك دقيقه

ادري جمالك ياخذ العقل فتان
ومليون وحده تبغى لقربك طريقه

واعرفني اسكن في ضلوعك من زمان
وتموت فيني وتعتبرني عشيقه

وادري وفي وقلبك للعهود ماخان
واشوف لمع خدك وصلني بريقه

وساعه على رنجك وساعه على حصان
والبانورما موقفه بالحديقه

وبسويسرا تصيف وفي لندن احيان
وثقيل مااعندك ياوافي صديقه ُ

لكن بقلبي مالك اليوم مسكان
اكره وصوفك وحتى اسمك مااطيقه

وقلبي خلي لا تحسبه الحين عشقان
والله ماني بالمحبه غريقه

من صغر سني احسبك حسبة اخوان
ومعزتك عشق الشقيق لشقيقه

واذا جرحوني صحت سلطان سلطان
وتركض تجيني ماتتأخر دقيقه

صغار كنا مانبالي ولا كان
بالنار نلعب مانخاف الحريقه

والحين كبرنا وغيرتنا هالازمان
واصبحت اذا شفتك تجيني الف ضيقه

واغلى عمامي من هالابيات زعلان
لكن وربي هذي هي الحقيقه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر