عاش للمجد سلطان (رد على سلطان بن عبدالعزيز) - خالد الفيصل ال سعود

عاش للمجد سلطان به الجود زايم
قدمته المكارم في نحور المسيره

ماينول المراجل كود خصم الخصايم
مثل ابوخالد السلطان في كل ديره

طبت من كلمتك لي ياقوي الشكايم
أستمد العزايم منك وارقى عسيره

ياطبيب القلوب اللي مرضها هضايم
في زمان صغيراته غدت بالكبيره

وياظلال الوجيه اللي شوتها السمايم
مالقت بالمظامي مزبن تستجيره

ويا دليل العقول اللي تخبط هوايم
كنه الجدي في ظلماتها نستشيره

ويا ربيع الهقاوي عقب ماهي هلايم
من تعلق جنابك يرتوي من غديره

حاضر بالمراجل مثل ماهي قدايم
أمسك ويومك وباكرمعك له ذخيره

© 2024 - موقع الشعر