تأثير الغياب - مطلق القعيمة

يا طعون الوقت في صدري اكلي واشربي
لين يروى من جروحي ويشبع كل ناب

عقب ما عنيت رجلي وغبرت اشنبي
ما بقى غير الدسم واختلط به سم داب

لو تلافيت الطمع واكتفيت بمكسبي
ما فجعني موت حلمي بريعان الشباب

ودي اشري راحتي واستريح مْن اتعبي
بس ماخذ مقلب ٍ في خطاي انه صواب

كم لي اسأل باكر و في سؤالي مطلبي
انت ريح ٍ صرصر ٍ عاتيه و الا سحاب

لا لبس ليلي نهاري مثل سود العبي
اختنقت بشي ٍ اكبر من اعراض اكتئاب

الدقايق تزحف شوي وشوي اتحبي
ودون عرش الصبح فوق الف حارس والف باب

كنها بالطول مقدار تفكير الغبي
في سؤال ٍ ما لقى له بعد طرحه جواب

الجفا عكر مزاجي وكدر مشربي
والرجا ظاهرْه رحمه وباطنْه العذاب

يا معذبني معك من عذابي وش تبي
والله ان الصبر ما عاد في خرجه زهاب

ليه يا مسلم بعد مت انا وانت اسببي
تعتبر ذبحي حلال ٍ وفيه اجر وثواب

ابشر ان الكهل من لوعتي عود صبي
كان قصدك تختبر كيف تأثير الغياب

كن يومي في غيابك عمر نوح النبي
وانتظاري عند بابك إلى يوم الحساب

غبت ما خليت لي غير ناري وحطبي
بس ليت الشوق عني مثل ما غبت غاب

ذنبي انه واصل ٍ فيك وصل امي وابي
قلبي اللي ما بعد تاب من حبك واناب

مملكتك اللي هنا يالزعيم اليعربي
لا تخلي شعبها للمجاعه والخراب

انت بس اطلب وعطني من العفو اطلبي
واغفر الزله بجاه الغلا قدر وجناب

سلهم بسحر ٍ عراقي وسحر ٍ مغربي
لين اسافر في عيونك بتذكرة الذهاب

ايه احبك لو سبا راحتي حبك سبي
ولو ضلالي في غرامك ضلال اهل الكتاب

ايه احبك وانت في كل عشق ٍ مذهبي
وانت رغبة خاطر ٍ ما سمح منها وطاب

مبدأ راسخ ويؤمن به الحر الأبي
ما يساوم فيه ابد لو على قطع الرقاب

© 2024 - موقع الشعر