عااااجل : من الديوان الشعري إلى الديوان الملكي - عبدالله بن نور الأسعدي

تهيضت وبديت ابمن بذكره تطمئن اقلوب
هو الله وحده وخير البدايه لابدينابه

ومن ديوانه الشعري يدز الاسعدي مكتوب
إلى ديوان عمدان الوطن ونا من اطنابه

مفاده عد خلق الله وعنده عدهم محسوب
له الحمد وله المنه على الخير اللذي جابه

شفا اللي رافع الرايه نشوفه خيرنا المرقوب
ولو حنا غياب اعْنَ الوعي في فترة اغيابه

يبو متعب تعبت وكل شعبك من تعبك اتعوب
يبو متعب تشافيت وشفاك الشعب يشفابه

سلامات وطهور وذا دليل انك رجل محبوب
لدى رب العباد وحظك انك ضمن أحبابه

يقدر لك سبب واحد عشان انه يزيل اذنوب
ولو في حجمها تازن جبال الكون وهضابه

دليل انه يحبك عان من فعلك دول وشعوب
جميع اقلوبها وعقولها بالحب منصابه

عسى من لامنا في حبنا لك ينطري منكوب
عشان انك تغيثه ويْعَرِف واحد من اسبابه

إلى حكامنا اللي حبهم فقلوبنا مشبوب
خذوا منا عهَد بالفعل ماهو نطق وكتابه

ولاني نايب آل اقراض أو نايب ذوي شنخوب
ولا نايب ذوي عبيان والا شامل عتابه

عن الشعب الوفي كله أنوب اوجيتكم مندوب
أجدد بيعة الحكم الأبونا ونتباهابه

لكم منا ولا والكم نقدم روسنا ماجوب
فدا الدين وفدا موطن عزيز وعزنا اترابه

ترانا كلنا عسكر لو اكثرنا لباسه ثوب
ليا من ثارت الهيجا نضد اجيوش حرّابه

ليا جانا عدو يزحف مثل زحف امهات اجنوب
على نيراننا والله ليشكي من تقلابه

ندوس اللي نفث سمه يبى الإفساد بالعرقوب
بعدما نكوي اخناعه بنيرانه ومنسابه

ترى الشعب السعودي عاقل ولايجهل الملعوب
ولامنهم حدن رايح مع الكذاب واحزابه

لأن الحاكم الحالي هو المصلح هو المرغوب
هو اللي للعرب محزم ودرع وسيف وعصابه

لأنه هو واخوانه ورى امعزي بخير ادروب
هي القرآن والسنه ومنها الخير عشنابه

قبل حكم السعود اوبعده انشوف الوضع مقلوب
إلى الأحسن وشاعركم دليله قول شيّابه

قبل كان العسر بالحج والعمره غصب مصحوب
بعد صار اليسر شقيقها والها هو ايشابه

قبل كان الامن معدوم ذا ناهب وذا منهوب
بعد صار الرجل يرقد وبيته فاتح ابوابه

قبل كان الرجل يجلس شهور اوهو خلي اجيوب
بعد صار الرجل في كل بنك امعبي احسابه

قبل كان الفقر ذيب الرجال اولاهو ابمغلوب
بعد صار الفقر فاقد مخاليبه وأنيابه

قبل كان الفلاني والفلاني دايما فحروب
بعد صار المقيم ايعد كل الشعب أقرابه

قبل كان الغني من ماله البيت الشعر منصوب
بعد صار الفقير ابلاش مسكانه ومزهابه

نِعم لو تنتعدد عدها في عدها مضروب
وناتجها يضاعف لين تخرب كل حسّابه

عساها دايمه والشكر للواهب من الموهوب
عساها ماتجيها عين من هي نالت اعجابه

تطمن كل شعبك ياملكنا لبوا المطلوب
قلوب الشعب تدعي لك بسر افوقت الاجابه

ختام القول صلو عد ماينطف لذيذ الذوب
على نبينا المرسل وكل آله وأصحابه

© 2024 - موقع الشعر