مسراء الليل

أنا مايوسع خاطري غير مسراء الليل
على الأقطم اللي كن لون السماء لونه

مع الخط لأشبت قزوزه وشد الحيل
يدوب الدريول يلمح الناس بعيونه

على دربه .. المواتر اتحط ولا تشيل
يطوف المواتر .. تقل يمشي على هونه

يشوح الدروب ولانتهض كنه الأصيل
بعيد الدير تقرب لأ كيمت طبلونه

على مقدمه علامته مثل (نجم سهيل)
شبح كل قطعه فيه بالصنع مضمونه

تلامع جنوطه كنها لمعة الأستيل
تشوف الفخامه من ركونه ليا ركونه

مع الدرب يرسي كنه محملن تحميل
تثبت عقالك فوق طارة درقسونه

من ايصير بسمه كبه مدللن تدليل
ولا خلص به الديان لو كثر ديونه

تفرد به الجفال وصبح له الوكيل
ضعاف الدخل من فقرهم مايسومونه

تنصآ وليفن رمشه مضللن تضليل
شربت الهواء من راح كفه وماعونه

سلامي عليه بريحة المستكه والهيل
من اعماق قلبي ياصله مايجي دونه

أنا في غلاه وحبه مكبلن تكبيل
أي والله مجنونه وبموت مجنونه

لأ ون الامور معقده بين عدل وميل
ضمير الشقي يرتاح لا شاف مضنونه