الشوق يذبح والنوى يحرق الشوق
والليل ذكرى للقلوب العليله
والعشق عاشق يعشق احساس معشوق
يفهم شعوره كل يومٍ وليله
وأنا عشقت من المزايين غرنوق
أم العيون الناعسات الكحيله
فيها الحلا مصدر مميز وموثوق
اختصها الله بالصفات الجميله
عيون سود وعنق فارع ومنتوق
وخصرٍ نحيل وردف نابي تشيله
فوق الحلا طيبه وخفه ومنطوق
ورزه وأناقه وبالتعامل ثقيله
تمشي دلع بين المخاليق برفوق
من شافها ياويل حاله و ويله
حتى ليا منها بغت شي بالسوق
السوق كله يرتبك لو تجيله
كنت بنظرها غير عن كل مخلوق
انسان مامثله ولا احدٍ مثيله
تقول حبك فوق فوق السماء فوق
شامخ مدام إن الوفا أكبر دليله
وكانت تقول إن الغلا داخل الموق
محفوظ في عيني ولا احدٍ يزيله
وكانت تحملني مشاريه وحقوق
وإن غبت جابت علمي بأية وسيله
واليوم راحت منبع الحسن والذوق
فجأه تلاشى الحلم وعزم رحيله
الصبر زين وكل مطرود ملحوق
ولا لي مع الأقدار حيلٍ وحيله
أطوح الونه على كل طاروق
بيتٍ اشيله وبيت حزني يشيله
اشتقت لكن النوى يحرق الشوق
والليل ذكرى للقلوب العليله
وقلبي غدا من سبتة الشوق محروق
تحرقه ناره كل يومٍ وليله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين