فارقتها .. معقول : لا ماهو معقول - ناصر عبيد الرشيدي

مدري وش أكتب .. مدري والله وش أقول
عيت هواجيسي تحدد هدفها

الراس من كثر التفاصيل مشغول
من سجةٍ تسحبني سحب بطرفها

ياكثر مافيني من أفكار وحلول
أنوي على فكره وأرد احذفها

وإذا طرت لي فاتنة كل العقول
أنقا النوادر لجلها واعسفها

وتفيض وديان المشاعر لها سيول
وكل اللحون طيعني واحترفها

ماني من اللي يعسره قاف مقفول
أقسى القوافي لجلها ألعن جدفها

الجادل اللي وصفها شرحه يطول
حتى الحلا يغار لامن وصفها

عيون مدعوجه وعنقٍ ومجدول
وخصرٍ يمايله الهوى من ترفها

كل الوصايف زاهيه عرض مع طول
لا يابعد جد الوصوف وخلفها

حبيتها والحب ساري ومفعول
رغم إن قلبي بالغلا مانصفها

فجأه بلا موعد ولا عذر مقبول
غابت وموج البعد عني جرفها

راحت وخلت حزن الأيام مدبول
كنها تقول أبلش بها وأغترفها

فارقتها .. معقول : لا ماهو معقول
شلون أفارقها وقلبي ولفها

أقول ولا أقول .. مدري وش أقول !!
هي وردةٍ غيري من إيدي قطفها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر