معقول يعشقني وهذي سواياه ؟! - فيصل الصلهام

اللي رحل من دون توديع وش جاه
ليته قبل يرحل مسيّر عليّه

يمكن تبيّن في لقانا نواياه
وتخف صدمات الفراق القويّه

صد وطعني وأتعب القلب وأدماه
وانا ضلوعي جد ماهي خليّه

معقول يعشقني وهذي سواياه
وشلون يتركني بليا خطيّه

عزاه ياقلبي من الهم عزاه
كنت احسب انه مايخلي خويّه

أستسمع لطاريه في هرج الافواه
يمكن يحن ويطري اليوم جيّه

وأتخيله في صحوتي وأتحاشاه
وإليا غفت عيني لقيته هنيّه

أشتاق له وأغليه وأعشقه وأهواه
وتفداه روحي وأرحبي يالمنيّه

وعقب المحاتا والسهر والمعاناه
وعقب العنا والملعنه في القضيّه

كنّي بزوله جاي يستعجل خطاه
ومن مشيته حسيت ماهيب ليّه

مر وتعداني وهدّا بممشاه
ثم إلتفت لي والمدامع نديّه

سلّم علي ومد لي كف يمناه
ويسأل لعل من الغلا له بقيّه

ويسأل عن الاحوال من عقب رفرقاه
ماهيب لله مير شمّات فيّه

على العموم بخير والحمدلله
القلب طيّب والسعاده وفيّه

© 2024 - موقع الشعر