العام انا وياه نسمع لـ(تذكار) - ناصر عبيد الرشيدي

دار الهوى ياصاحبي والهوى دار
واستدرجت بعض القوافي رحيله

محتار من شيٍ يخليني احتار
وشلون يصبر من طوى الهم حيله

ماكنت اصدق كل هذا لنا صار
وإن الخليل يصد عنه خليله

عشت الجروح امرار وامرار وامرار
اشيل جرح وجرح عييت اشيله

الهم ترصدلي مع سبق الإصرار
وحكم علي الليل إني قتيله

يوم افترقنا انطفت كل الانوار
وحارت دموع العين من تشتكيله

العام انا وياه نسمع ل(تذكار)
واليوم نسمع (افترقنا في ليله)

كتبت فيه احلى القصايد والاشعار
وبنيت له كل البيوت الجزيله

دام الوصل معدوم ماتفيد الاعذار
معاد لي غايه ولا لي وسيله

الحب مثل البحر والبحر غدار
مهما عطى لابد يطعن دخيله

الوصل جنه والجفا طبعا النار
والوقت قاسي والقوافي دليله

ماني مصدق كل هذا لنا صار
والله يعين اللى مفارق خليله

© 2023 - موقع الشعر